Patay ang isa ka lalaki matapos nga maigo sang bulang ka manok sa Sitio Pasil, Barangay Refugio, Calatrava sang Enero 31 sang hapon.
Sa interview sang Bombo Radyo Bacolod kay Police Major Wilfredo Benoman Jr., hepe sang Calatrava Municipal Police Station, nagatakod sang bulang ang biktima sa inugbulang niya nga manok apang ini ang nagpalak-palak.
Ginhakos sang biktima ang manok gani naigo ini sang bulang sa butkon kag dughan.
Gindala pa ini sa Calatrava Hospital apang wala na natabangan pa.
Ang biktima ang isa 21 anyos kag nagboluntaryo nga magtakod sang bulang bangud suno sa mga naestorya sang mga kapulisan, maswerte ini kag masami nga nagadaog ang ginatakdan niya sang bulang.
May permit naman nagikan sa banwa ang bulang nga ginpasakupan sang biktima.
