Nahatag na sa pamilya sang security guard nga ginpatay sa Purok Zone 1, Barangay Handumanan, Bacolod City ang original death certificate agud nga mapalubong ang biktima.
Kahapon, kaupod ang Bombo News Team nagpadulong sa Barangay Cabug ang pamilya sang biktima nga si Arnold Caballes kag nakitaay sa live-in partner sang biktima nga si Dholly Malalu-an.
Nagdihon man sila sang kasulatan nga ihatag na ni Malalu-an ang original copy sang death certificate sang napatay kag pagkatapos magakanya-kanya na ang mga ini sa ila pagpangabuhi.
Ang paghimo sang kasulatan ang ginpatung-an sang isa ka empleyado sang Barangay.
Sa interview sang Bombo Radyo Bacolod kay Bernadette Caballes ang iloy sang biktima, tuman ang pagpasalamat sini nga nakuha ang original nga kopya sang death certificate.
Ginpasalamatan sini kag sang amay si Malalu-an sa paghatag sang nasambit nga dokyumento agud nga mapalubong na ang minatay kag makapangabuhi na ang tagsa-tagsa.
Samtang, ihatag naman kuntani ni Dholly Malalu-an ang death certificate apang luyag lang sini padugayan agud nga madudla ang pamilya sang kalive-in sini bangud masakit man ang ginhimo sang mga ini sa iya.
Suno kay Malalu-an, dapat nagrekta sa iya ang pamilya sa baylo nga nagpadulong sa media outlets agud mangayo sang bulig.
Karun nga nahatag na sini ang death certificate mangabuhi na ang mga ini sang malinong.
