Ginsiguro sang Department of Social Services and Development-Bacolod nga ang nabaton sang mga tenants sang Manokan Country nga ayuda ang makabulig gid sa pag-umpisa sang ila livelihood.
Nahibaluan nga naghatag sang financial assistance ang DSSD nga nagabalor sang P20,000 kada isa sa pila ka mga tenants sang Manokan Country nga nagsaylo na sa ila temporary stalls sang isa ka mall sa reclamation area sang ciudad sang Bacolod.
Sa interview kay Dr. Richelle Verdeprado – Mangga, pinuno sang Department of Social Services and Development-Bacolod, dapat masiguro nila nga makabulig gid sa mga apektado nga tenants sa pag-umpisa liwat sang ila palangabuhian ang kantidad nga ila nabaton.
Suno kay Manga, eligible ang mga tenants sa bulig bangud nalakip ang mga ini sa kategorya sang demolition.
Ginpahayag man sini nga man ibalikan ang mga tenants agud nga lantawon kun nagamit na gid man sang mga ini sa pag-umpisa sa ila temporary stalls ang kwarta nga ila nabaton.
Wala pa nareleasan ang tanan bangud kinahanglan pa sang iban nga magpasa sang documents nga ginapangayo sang DSSD.
