Indi na lipod sa tanan nga mabatyagan nagid ang epekto sang Climate Change diri sa kalibutan kag nakuha sang Pilipinas ang ikanapulo nga pwesto sa mga pungsod nga tuman nga naapektuhan sang extreme weather events sa nakaligad nga 30 ka tuig.
Ini ang nagwa sa 2025 Climate Risk Index report (CRI) ng non-profit organization nga Germanwatch.
Nabutang sa report kun paano ginwaswasan ang Pilipinas sang madamo nga mga bagyo sa kada tuig sadtog 1993 tubtob sa 2022 kun sa diin may kabug-usan nga 372 extreme weather events ang ginapangatubang sang pungsod nga nagbilin sang $34 billion nga kahalitan sa sulod sang 30 ka tuig.
Gintumod man sa report nga ang Typhoon Haiyan ukon may local name nga Super Typhoon Yolanda nga ginakabig nga pinakamakahalalit nga bagyo nga nagtuga sang kabug-usan nga $13 billion nga kahalitan kagnagpatay sa 7,000 ka mga tawo.
Ang nagapanguna nga mga pungsod sa listahan nga pinaka-apektado sang extreme weather events amo ang Dominica, China kag Honduras samtang yara sa ikaapat ang Myanmar kag panglima naman ang Italy.
Nagasunod diri ang India, Greece, Spain kag Vanuatu.
