Ginpasalig sang provincial director sang Negros Occidental Police Provincial Office nga wala sang pagbag-o sa security status sang probinsya may kaangtanan sa 2025 Midterm Elections apisar sang nagluntad nga engkwentro sa tunga sang militar kag rebelde nga New People’s Army sa Barangay Caduha-an, Cadiz City sang nakaligad nga semana kag pagpangluthang sa isa ka militar sa San Carlos City.
Sa interview sang Bombo Radyo Bacolod kay NOCPPO Director Police Col. Rainerio de Chavez, nagapatigayon sang joint investigation ang Cadiz City Police Station kag 79th Infantry Battalion sa nasambitan nga engkwentro kun sa diin tatlo ka NPA members ang naka-engkwentro sang militar.
Paathag sini nga sa peace covenant signing, yara man ang hepe sang Cadiz City Police Station kag pamunuan sang Armed Forces of the Philippines, kag sila ang wala pa sang may namonitor nga sarang makahatag pamahog sa nagahilapit nga eleksyon.
Sa pihak nga bahin, padayun man nga gina-imbestigaran ang pagluthang sa isa ka military personnel sa Sitio Takas, Brgy. Palampas, San Carlos City, Negros Occidental kahapon.
Suno kay De Chavez, wala sang nakita nga kaangtanan sa eleksyon sa nasambitan nga insidente.
Apang paathag sini nga sila ang may nakita na nga motibo sa krimen, nga sa karun indi pa nila mabuyagyag sa kahanginan.
Ginapakamaayo man sini nga nadakpan na ang duha ka suspect nga sanday Jobert Gimarangan kag Alfie Raganas Sr.
Ang duha ang pasakaan sang kaso nga frustrated murder, violation sa election gunban sa paghupot sang high powered firearm, illegal nga paghupot sang explosives kag paghupot sang ginadumilian nga suspected shabu kag marijuana.
