Tuman ang kasubo sang iloy sang nalumos nga 24 anyos nga lalaki nga wala nahingagaw masalbar ang iya bata sa Brgy 10, Bacolod City, kahapon.
Sa interview sang Bombo Radyo kay Janet Beloya, mabuot, mabinuligon kag mapinalanggaon ang iya bata nga si Troy Beloya.
Kahapon, namissing si Troy matapos maglumpat sa dagat sang nagkulob ang bangka bangod sa mabaskog nga balod.
Kaupod ni Troy ang iya magulang kag bana sang iya honablos apang si Troy gid lamang ang wala nakabutwa.
Nagpatigayon sang search and rescue apang wala natigayon nga nakit-an ang biktima.
Suno sa iloy, kagab-i gin-untat na ang pagpangita sa iya bata bangod madulom na ang palibot apang iban sa mga abyan ni Troy ang nagpadayon sa pagpangita.
Nakit-an nga naga-utaw utaw ang bangkay sang biktima sa baybay nga sakop sang Bredco Port pasado alas- 11:00 sang gab-i.
Pahayag ni Janet, tuman ka sakit para sa iya nga madula ang iya bata paagi sa hilaw nga kamatayon.
Dugang pa sini, kun ginpasulod lang sila sang timprano sang guard sang Bredco port kag ginpabay-an lang nga pangitaon si Troy, basi kun nahimo pa kun tani nila masalbar ang iya bata.
