May persons of interest na ang Murcia Municipal Police Station sa mahimo nagtiro sang Indian Target sa Aspin nga si Tiktok.
Madumduman nga madasig nga naglapta sa social media ang litrato ni Tiktok nga may igo sang lima ka Indian Target.
Ang ido ang ginrescue sang BACH project, ginpa-operahan kag sa karun nagarecover na.
Samtang ang donasyon para sa reward money sa may kahimuan sang pagpanghalit ang sa karun nagsaka na sa P750,000.
Si Murcia Mayor Gerry Roxas ang nagdonar man sang P10,000 sa reward money, kag nagpanawagan sa Murcia Municipal Police Station sa pagpatigayon sang imbestigasyon.
Sa interview sang Bombo Radyo Bacolod kay Police Major Sherwin Fernandez, hepe sang Murcia Municipal Police Station, kahapon lang sila nakabatun sang complaint kag nauna pa nga ginpalapta sa facebook.
Gani aminado ini nga may kabudlayan ang pagpangita sa mga suspects bangod ang mga ini ang makahimo na sang rasun agud malikaw sa ila ang imbestigasyon.
Sa karun, ginpadulungan na nila ang lugar kun sa diin narecover ang ido kag nakighinun-anon sa tiya sang 14 anyos nga agalon, bangod ini ang nagserbe nga representative sang bata.
Aminado ini nga sila ang may persons of interest na apang wala pagid sang ebidensya nga makatudlo nga ang mga ini ang may kahimuan sa pagpanghalit bangod wala paman sang may nagagwa nga witness.
Sa karun, ginatumod nila ang mga alibi kag kun sa diin ang mga ini sang Domingo, sa tion nga natabo ang pagpaniro sang Indian Target.
Wala naman ini nagpagwa sang dugang nga impormasyon tuhoy sa persons of interest agud indi ang mga ini maalarma kag magpalagyo.
Suno kay Fernandez, ang Indian Target ang makonsiderar nga deady weapon gani mangatubang sang kaso ang madakpan nga nagahimo sini.
Magluwas diri, ang may kahimuan sang pagpanakit ang segurado man nga mangatubang sang kaso sa paglapas sa Animal Welfare Act.
Gin-athag man sini nga ang Murcia Municipal Police Station ang wala sang ihibalo sa reward money bangod ini ang wala man nakoordinar sa ila.
