Nagpadangat sang suporta ang European leaders kay Ukraine President Volodymyr Zelensky matapos ang mainit nga pagsabtanay sang mga ini sa ginpatigayon nga pakighinun-anon kay US President Donald Trump sa Oval office sang Biyernes, Pebrero 28.
Kalakip sa mga nagpabutyag sang suporta si European Union chiefs Ursula von der Leyen kag Antonio Costa nagpasiguro kay Zelensky nga wala ini nagaisahanon.
Sa joint statement, nagpanugyan ang duha ka lider kay Zelensky nga mangin maisog kag indi magkahadlok kag ginpasiguro nga magapadayon ang mga ini sa kooperasyon para sa kalinong
Ginpahayag naman ni French President Emmanuel Macron nga ang Russia ang aggressor sa giyera sa Ukraine kag ang Ukraine ang naagrabyado.
Nagpangako man ini sang bulig sa Ukraine kag sanction naman para sa Russia sa sulod sang tatlo ka tuig kag magapadayon pa ini.
Suno pa kay Macron kun may yara man sang nagasugal para sa World Ward III, ini amo si Russian President Vladimir Putin.
Ginatumod sang French President ang akusasyon ni Trump kay Zelensky.
Nagpahayag man sang supporta si outgoing Germany chancellor Olaf Scholz para sa Ukraine, kasubong man ang iban pa nga world leaders nagikan sa Netherlands, Poland, Spain, United Kingdom, Canada, Denmark kag Sweden.
Sa bahin naman sang Russia, nga una naglunsyar sang full scale invasion sa Ukraine, ginpahayag ni Russian Security council deputy chairman Dmitry Medvedev nga sa una nga kahigayunan nagpahayag si Trump sang kamatuoran sa atubang ni Zelensky nga gintawag pa sini nga “cocaine clown”.
Samtang, nagpanawagan naman si Italian Prime Minister Giorgia Meloni sa US, Europe kag sa ila nga mga kaalyado nga magpatigayon sang Summit nga wala sang delay agud nga diskusyunan ang giyera sa Ukraine.
