Naghatag sang reminders ang Bureau of Fire Protection (BFP)- Silay City sa karun nga ginaselebrar ang Fire Prevention Month.
Sa interview sang Bombo Radyo kay FO1 Edmel E Rubio- Acting Chief Community Relations Unit, may yara ang BFP sang ginpreparar nga mga activities para sa mga kabataan kaangay sang Fire square road show sa mga preschools.
Suno diri, mas maayo nga suguran na sang timprano ang pagtudlo sa mga kabataan agud timprano pa madevelop ang ila paghibalo sa paglikaw sa sunog.
Gintudluan ang mga kabataan sang E.D.I.T.H ukon exit drill in the home para kun may sunog makahibalo ang mga mga ini nga indi magpanic.
Samtang, may yara man sang patigayunon nga Brgy Ugnayan para sa fire safety lecture kag workshop sa mga brgy ilabi na sa Brgy Mambulac, Rizal, E Lopez kag Guimbala-on.
Nagpaandam man si Rubio, nga kun may sunog ginakabig nga dilikado nga lugar amo ang kwarto kag cr kun sa diin mahimo matrap ang tawo.
Samtang nagpanugyan naman si FO1 Joanzen D Estrella, Public Information Officer sa pumuluyo nga mangin responsable agud indi makahalit sa komunidad.
Suno diri, ang fire safety awareness ang indi lamang trabaho sang BFP apang ini ang para sa tanan nga mangin responsable bilang miyembro sang komunidad.
Nagapati si Estrella nga indi makonsiderar nga progressive ang ciudad kun wala sang safety.
Ginhangkat sini sa karun ang tanan nga mangin aktibo sa pagpartisipar sa programa sang BFP.
Samtang, nagpanugyan naman si FO1 Garry T Cabayao- Assistant Fire Truck Operator/ Fire Suppression Personnel nga mangin responsable sa paggamit sang appliances kag gadgets.
Suno diri, kun wala ginagamit ang appliances mas maayo nga kakson sa outlet kag inid pag-over use ang gadgets.
Ini bangod kalabanan sa mga ginarespondehan nila nga fire incident amo ang bangod sa electrical in nature.
Nagpanugyan man si Cabayao sa mga ginikanan nga bantayan ang kabataan kaangay na lamang sa natabo nga sunog sa Brgy Mambulac matapos napabayaan ang mga kabataan nga naghampang sa kalayo.
Mahimo matawagan ang Silay City Fire Station sa telephone number nga 495-47-27 kag cellphone number nga 09321108181.
