Nagdangat sa P1.4 million ang narecover nga shabu sa isa lamang ka adlaw nga drug buybust operation sang nagkalainlain nga police unit sa Western Visayas.
Ini ang recoveries sa Anti-illegal drugs campaign humalin alas-6:00 sang aga sang Pebrero 28 tubtob alas-5:59 sang aga sang Marso 1.
Ang narecover nga shabu ang nagdangat sa kabug-aton nga 213 gramos nga balor P1.4 million, nga nakaaresto sang 11 ka persona.
Sa Bacolod City ang may pinakamadamo nga drug recoveries nga nagdangat sa P567,000, ginsundan sang Iloilo City nga P510,000, Iloilo province nga P340,000 kag Negros Occidental nga P36,000.
Pasalig ni Police Regional Office 6 Director Police Brig. Gen. Jack Wanky, nga padayun ang pagpasanyog sang kampanya batok sa illegal nga droga kasubong man ang pagseguro nga makasuhan ang mga drug personalities.
Ginkilala man sini ang suporta sang nagkalainlain nga stakeholders.
Paathag sini nga kinahanglan ang mas mabaskog nga kampanya agud maproteksyonan ang mga kabataan batok sa illegal nga droga.
Ang mga naaresto ang mangatubang sang kaso sa paglapas sang Republic Act 9165 ukon Comprehensive Dangerous Drugs Act of 2002.
