Nagahulat sa gihapon ang pamilya sang lapsag nga napatay sa Bago City Hospital sang ipresentar nga impomasyon sang Fact Finding Committee angot sa imbestigasyon sa pagkapatay sang bata.
Madumduman nga nagbata si Jennifer Saylo sa Bago City Hospital sang Pebrero 18 apang ginreklamo sang pamilya ang ospital sa gina-alegar nga may sala sa pagpabata sa pasyente nga nagresulta sa pagkapatay sang lapsag.
Sa interview sang Bombo Radyo kay Patrick Saylo, asawa sang pasyente, ginpatawag sila nakaligad nga semana para kuhaon ang ila bahin apang tubtob sa karun wala pa gid sa Fact Finding Committee ang nagcontact sa ila.
Suno diri, sila ang ginhambalan nga may isa pa gid ka complaint sa ospital amo nga ginapahulat-hulat sila sang resulta sang imbestigasyon.
Nagakahangawa ini sa karun nga basi butangan pa sang palusot ang imbestigasyon.
Nagapanawagan ini sa karun kay Mayor Nicholas Yulo nga padasigon ang imbestigasyon para mahibaluan kun ano ang kamatuoran bangod luyag sini nga magpasaka sang kaso para sa hustisya sa iya bata. Samtang, ginpahayag ni Bago City Mayor Nicholas Yulo nga wala na ini mahimo kun nagaduda ang pamilya sang napatay nga lapsag sa imbestogasyon apang nagpasalig nga ginatrabaho nila ang ila obligasyon.
Sa interview sang Bombo Radyo sa alkalde, may isa pa ka dapat nga interviewhon ang Fact Finding Committee kag gina-isa isa lang ang trabaho.
Suno diri, kun wala pagsalig ang pamilya sa komitiba, wala na ini sang mahimo pa.
Gin-athag man sini nga ipresentar sa iya ang imbestigasyon apang indi ini pag-ipresenta sa publiko bangod ini ang sensitibo, apang nagpasalig man nga ipahibalo kun ano ang rekomendasyon diri kun may yara bala sang penalidad agud mangin patas sa nakatungdan.
Pahayag ni Yulo, bisan pa may rekomendasyon na, dapat anay hatagan sang tsansa ang ospital para sa insakto nga proseso.
