Aminado ang sports coordinator sang Negros Occidental nga nagalagas ang probinsya sang Iloilo sa medal tally sang Negros Occidental sa nagapadayon nga Western Visayas Regional Athletic Association (WVRAA) Meet nga ginapatigayon sa probinsya sang Antique.
Sa interview sang Bombo Radyo Bacolod kay Romeo Sison, sa athletics nagbawi ang probinsya sang Iloilo kun sa diin nagdugang sa ila nga Gold Medals nga nakaamat-amat badbad sa abanse sang Negros Occidental.
Wala man sang problema sa mga atleta kag sa delegado sang probinsya bangud kun may maglain ang pamatyag may yara man sang naka standby nga medical personnel.
Bisan may kakulang sang tubig sa belitting areas, may yara man sang deep well ukon bubon sa area nga mahimo paliguan sang mga atleta.
Ginpahayag man ni Sison nga pila ka rason nga maayo ang performance sang mga atleta amo ang presensya sang ila mga ginikanan kag himata nga nagpadulong gid sa Antique agud nga suportahan ang mga ini.
Nagpanawagan man ini sang suporta kag pagpangamuyo para sa suporta sa mga atleta sang probinsya kag dako sa gihapon ang paglaom sini nga ang Negros Occidental ang mangin champion subong nga tuig nga WVRAA Meet.
Ang Negros Occidental sa Elementary level ang nakakuha sang 24 gold medals, 14 silver medal kag 20 bronze medal; Iloilo nga may 22 gold, 21 silver kag 11 bronze; Capiz nga may 4 gold, 6 silver kag walo ka bronze medal; Guimaras nga may 1 gold, 9 silver kag 2 bronze; Antique nga may 1 gold kag 2 bronze medal; kag Aklan nga may 1 silver kag 8 ka bronze.
Sa Secondary level, nagapanguna sagihapon Negros Occidental nga may 30 gold medals, 20 silver medals kag 20 ka bronze medals; Iloilo nga may 28 gold, 33 silver kag 18 bronze; Aklan nga may 13 gold, 11 silver kag 10 bronze; Capiz nga may 4 gold, 10 silver kag 19 bronze; Antique nga may 1 gold, 2 ka Silver kag 5 bronze; kag Guimaras nga may 4 silver kag 5 bronze medals.
Samtang sa Para Games nagapanguna nga may 21 ka gold, walo ka silver kag lima ka bronze ang Iloilo; nagapangaduha ang Negros Occidental nga may siyam ka gold, napulo ka silver kag apat ka bronze; Aklan nga may isa ka gold; pito ka silver kag walo ka bronze medals.
