Ginarekomendar sang Resident Volcanologist sang Philippine Institute of Volcanology and Seismology (Phivolcs) Kanlaon Volcano Observatory, sa La Carlota City, Negros Occidental nga likawan ang pagpadulong sa 6 kilometers dangers zone sang Bulkan Kanlaon bangud nagapibilin ini sa alert level 3.
Sa interview sang Bombo Radyo Bacolod Engineer Mari Andylene Quintia, Resident Volcanologist sang Phivolcs Kanlaon Volcano Observatory, nagapabilin sa Alert Level 3 ang Bulkan Kanlaon kun sa diin ginarekomendar sang mga ini nga magpalayo sa 6km radius danger zone sini bangud sa mga hazards nga posible matabo sa tion nga maglupok ini.
Suno kay Quintia, sa tion nga maglupok ang Bulkan mahimo nga magtuga sang hazard nga lava flow kag mahimo mag-ilig nga magsangkad tubtob sa 6km radius.
Bangud sa mga ginaeksperyensya nga ashfall kun kaisa nagikan sa Bulkan Kanlaon nagpanugyan ini sa mga pumuluyo nga magpabilin sa sulod sang ila puluy-an kag kun indi mahimo magsuksok lamang sang facemasks bilang panaming sa abo gikan sa bulkan.
Suno diri kahapon ang PHIVOLCS ang nakarecord sang pito ka volcanic earthquakes kag sulfur dioxide emission nga 2,312 tonnes per day.
Manubo man ang mga average sang sulfur dioxide nagikan sa Bulkan Kanlaon.
Indi man kitaon sa karun ang bulkan bangud maulan-ulanon ang panahon.
Nagpanugyan man ini nga masami mag-aligmat kag magbisita sa social media page sang Philippine Institute of Volcanology and Seismology (PHIVOLCS) ukon website sang ahensya agud nga legit nga mga impormasyon ang makuha angot sa sitwasyon sang Bulkan Kanlaon.
