Nakasentro ang homiliya ni Most Rev. Patricio Buzon sa prayer, fasting kag giving sa una nga adlaw sang Lenten season.
Subong nga adlaw gina-obserbar ang Ash Wednesday kag sa misa nga ginpatigayon sa San Sebastian Cathedral, suno kay Most Rev. Patricio Buzon, kun mangadi ukon maghimo sang insakto nga butang ukon magfasting man, mas maayo nga tagoon ini kag indi pagpakita sa iban bangod ang Diyos nga Amay may nahatag na nga premyo sa iban kag siya ang may natalana man nga ihatag sa imo.
Ginpa-athag man sang obispo nga ang Ash Wednesday nagakahulugan nga ang tawo naghalin sa yab-ok kag magabalik man sa yab-ok.
Suno diri, ini ang nagapahanumdum kun diin naghalin ang tawo kag kun diin ini mapadulong.
Dapat man dumdumon sang tawo nga nagalabay lang ang kada isa sa aton sa kalibutan kag ang matuod nga balay sang tawo amo ang balay sang Diyos nga Amay.
Samtang, nagpanawagan man si Buzon sang pagpangadi para sa pagbalik sa Diyos.
Nakita sini nga kun kaisa madamo sang trabaho ang tawo kag wala na ini sang oras para magkonekta sa Diyos, apang dapat gid suno sa obispo nga hatagan sang tion ang pagpangadi bisan ano pa kadamo sang ginatrabaho.
Sa pagfasting naman, nagpanawagan ini nga likawan ang mga butang nga makahalit sa adlaw-adlaw nga pagpanglakaton sang tawo papalapit sa Ginoo.
Suno diri, likawan ang pagsturya sang indi manami sa komunidad kag kontrolon ang kaugalingon kun may temptasyon. Samtang, nagpanawagan ang obispo sang Diocese of Bacolod sa pagpagamuyo sa madasig nga pag-ayo ni Pope Francis.
Sa interview sang Bombo Radyo Bacolod kay Most Rev. Patricio A. Buzon, SDB DD Bishop of Bacolod, maayo ang mensahe sang Ash Wednesday, nga kita ang umalagi lamang sa kalibutan kag magabalik sa duta ukon sa yab-ok.
Apang sa padayun nga pagpangabuhi sa kalibutan, kita ang nagakabuhi sa lawas ni Ginoong Hesu Kristo.
Ang pagbutang sang abo sa agtang sa Ash Wednesday ang pahanumdom man nga kita ang indi lamang magabalik sa duta ukon sa lulubngan kundi kita ang dapat magbalik sa balay sang Amay.
Kag sa pagbalik sa balay sang Amay, kaupod naman natun si Hesus.
Sa Lenten Season, nga season of grace, madamo sang grasya nga nagahulat sa atun kun bukas ang atun tagipusuon.
Kadungan sini, ginpanawagan ni Bishop Buzon ang pagpangamuyo sa dalayon nga pag-ayo ni Pope Francis.
Bangod kinahanglan pa ang liderato sang Santo Papa indi lamang sa sulod sang Simbahang Katoliko kundi sa bug-os nga katawhan.
