Nakahunong na sa Talisay City Police Station ang Chinese National nga nagtiro sa iya magulang kag busines partner sa Brgy. Bubog, ciudad sang Talisay, kahapon sang aga, Marso 7, 2025.
Sa interview sang Bombo Radyo Bacolod kay Police Major Rhazl Jim Jocson, Deputy Chief of Police sang Talisay City Police Station, may yara sang nagluntad nga shooting incident sa Barangay Bubog kahapon sang aga.
Ang duha ka biktima ang Chinese National kag ang suspek ang Chinese National man kag natigayon nga madakpan ang suspetsado bangud nasugata sang mga nagresponde nga mga kapulisan matapos may nagpangayo sang bulig samtang nagapatigayon sang COMELEC checkpoint malapit sa lugar.
Suno kay Jocson, sa ila imbestigasyon sang January 2023 nagpirmahanay ang una nga biktima nga si Sammy Tan kag ang suspek nga si Jimmy Tan sa Barangay nga indi na ini makapalapit sa compound.
Suno diri, wala man nahibaluan kun ano ang natabo nga aga pa ara na ang suspek sa opisina kag naestorya pa sini ang iya nga magulang kag pagkatapos ginapahibalo nalang siya sang witness nga may nabatian nalang ini nga lupok sang armas-luthang.
Pagkabati sang lupok ang ikaduha nga biktima nga si Peter Lee nga business partner ni Sammy kag Chinese national man nagkadto sa opisina kun sa diin naghalin ang lupok kag nasugata ang suspek nga wala sang madamo nga gamo gintiro man ini kag naigo sa dughan kun sa diin padayon pa ang pagbulong sa iya.
Ang napatay nga biktima ang nakaangkon sang igo sa ulo.
Caliber 99 naman ang gingamit sang suspek kag isa ang fired cartridge ang narecover samtang ginaimbestigaran sa karun kun ano ang rason nga gindumilian ang suspek nga magsulod sa compound.
Frustrated murder kag murder ang ginalantaw nga ipasaka nga kaso apang nakadepende pa sa fiscal base sa mga documento nga ipasa sa pagpasaka sang kaso kag lantawon man kun may lisensya ang suspek sa paghupot sang armas-luthang kag kun ini ang mapasakaan man sang kaso nga paglapas sa COMELEC Gun ban.
