Patay ang backrider samtang pilason ang driver sang isa ka tricycle matapos nga aksidente nga mabungguan sang Isuzu pick-up sa Hacienda Busay, National Road, Barangay Punta Mesa, Manapla, Negros Occidental.
Sa interview sang Bombo Radyo Bacolod kay Police Major Robelito DL Mariano, hepe sang Manapla Municipal Police Station, may yara sang nagluntad nga aksidente sa lugar kun sa diin imbulbado ang pick-up nga nagaduag sang maroon kag tricycle.
Suno kay Mariano, ang mga imbulbado ang nagausoy sang magkatuhay nga direction kun sa diin ang pick-up ang nagausoy sang dalan padulong sa Cadiz samtang ang tricycle ang padulong sa Victorias.
Suno diri, sang nakaabot ang salakyan sa lugar sang aksidente nakatapak ini sa lutak kabangdanan nga nakaday-os ini kag nagderecho sa tricycle kag ini ang nabungguan.
Gindala sa ospital ang tricycle driver nga si John Rey Palmera kag angkas sini nga si Fredie Lobiogo apang gindeklarar nga dead on arrival.
Ang duha sa tricycle ang mga residente sang Victorias City nga magapauli na kuntani matapos nagpangita sang sapat nga baklon agud ihawon bilang ila nga negosyo samtang ang driver naman sang salakyan nga si Serafin Seniorin, residente sang Barangay Mandalagan, ciudad sang Bacolod ang padulong sa Cadiz bangud ini ang nagatrabaho sa telecommunication company.
Sa karun nagapaayo ang driver sang tricycle samtang ang driver sang pickup kag ang salakyan ang gincustody sa Manapla Police Station.
Nagpanugyan si Mariano sa mga motorista nga maghalong kag nagpanawagan sa mga salakyan nga nagadala sang duta nga kun may nawigit nga dala sang mga ini ang ipahigad agud malikawan ang kaangay nga aksidente.
