Ginalantaw sang human rights lawyer nga magadangat sa anom tubtob walo ka tuig antes matapos ang trial sang International Criminal Court sa kaso ni former President Rodrigo Duterte.
Sa interview sang Bombo Radyo Bacolod kay Atty Cesar Beloria, santo sa rules sang ICC, magapatigayon sang initial presentation kay Duterte karun sa gab-i sa pre-trial chamber.
Paathag sini nga ang ICC ang may pre-trial chamber, trial chamber kag appeals chamber.
Sa karun yara pa lamang sa initial phase kun sa diin ipresentar ang akusado, kag desisyonan kun ipadayun ang trial.
Suno kay Beloria sa nasambitan nga stage, ang respondent ang sarang makaraise sang reklamo.
Diri man magapresentar sang ebidensya ang mga naga-akosar samtang hatagan man sang tyansa ang kampo ni Duterte nga makapresentar sang ebidensya kontra sa alegasyon.
Suno diri, sang nakaligad wala nagpreparar ang kampo ni Duterte sang ebidensya bangid ang ginakaptan sang mga ini amo ang panindugan nga wala sang jurisdiction ang ICC.
Isa man sa argumento sang mga ini nga dapat anay ini nga ipresentar sa competent judicial authority sang local state, nga magaseguro sa validity sang warrant of arrest.
Sa paglantaw ni Beloria matapos sang initial presentation, magadangat pa sa duha tubtob tatlo ka bulan antes makadesisyon kun ipasaka sa trial chamber ang kaso.
Samtang magalawig naman sang tubtob walo ka tuig ang proceedings magluwas lamang kun wala sang kwestyon, wala sang motion, kag pag-assail sang procedure.
Suno diri, sa nasambitan pa lamang nga phase, malawig na ang proseso bangod kun magmosyon, ang pihak ang dapat pa nga magsabat ukon magdispute nga dugangan pa sang madamo nga mga pamilya sang gina-alegar war on drugs victims nga gamiton sang prosecution team.
Kun makita naman sa pre-trial nga wala sang nagakaigo nga basihan sa alegasyon, ang kaso ang mahimo madismiss kag mapabalik sa Pilipinas si Duterte.
Sa pihak nga bahin, kun mapamatud-an nga guilty sa alegasyon, ginalantaw ni Beloria nga magluwas sa sentensya si Duterte ang dagdagan man sang reparation for damages, ukon mga gingastos sa pagpabulong kag pagpalubong sang gina-alegar war on drugs victims. Samtang, mangin mabug-at para sa pamilya Duterte ang financial constraint sa pag-atubang sa trial sa International Criminal Court sa The Hague, Netherlands ni former President Rodrigo Duterte.
Sa interview sang Bombo Radyo Bacolod kay Human Rights Lawyer Atty Cesar Beloria, ang pinakadako nga magastos sang pamilya Duterte amo ang sa pagkuha sang International Lawyer.
Suno diri, sa arbitral case sang Pilipinas sa International court sang nakaligad, ang gobyerno ang nakagastos sang kapin P1 billion para lamang sa paghire sang abogado.
Dugang pa nga ginabanta nga magalawig sang anom tubtob walo ka tuig ang proceedings ilabi na nga madamo nga pamilya sang war on drugs victims ang ginalantaw nga magatindog nga testigo.
Dako man ang mangin gastos sa trial ilabi na nga ini ang patigayunon sa Netherlands.
Suno diri, may pila na ka mga grupo ang nagpabutyag nga luyag magbulig financially, kalakip na ang mga ordinaryo nga overseas Filipino workers nga nagcommit nga maga-amot amot agud makabulig, apang aminado si Beloria nga nagapanglakaak ang kadakuon sang kwarta nga kinahanglan sang pamilya Duterte.
Pahayag sang human rights lawyer nga ini ang mahimo makaapekto sa kampanya, ilabi na nga si Duterte amo ang nagatib-ong sa Senatorial slate sang PDP-Laban.
Apisar may budget constraint, nagapati si Beloria nga pabor naman sa mga ini ang simpatya sang publiko.
Ini bangod ang sadto mga nagaduhaduha pa kun sa diin nga kampo magasuporta ang nahaylo na nga magsuporta sa PDP-Laban matapos ang pag-aresto kay Duterte.
