Nagtililipon ang mga Pilipino sa Finland sa ginpatigayon nga rally kahapon bilang pagsuporta kay former president Rodrigo Duterte.
Sa interview sang Bombo Radyo kay Rose Roisko, Bombo International News Correspondent derekta sa Helsinki, Finland, may yara sila sang permit para sa rally kun sa diin may yara man sang police nga nagabantay para sa safety nila.
Suno diri, kapin sa 400 sila nga nagtipon samtang ang iban naman nga wala nakaupod ang nagpadala lang sa gihapon sang suporta.
Wala naman nangin upang sa mga Filipino ang matugnaw nga panahon para maggwa kag magrally.
Sa karun nagaplano na sila nga magululupod kag magpadulong sa Netherlands para magsuporta sa anay presidente.
Pahayag ni Roisko, sadtong Duterte administration kag nagpauli sila sa Pilipinas sa tion sang COVID 19, maayo ang pagtatap sa ila kag nahatagan sila sang ila kinahanglanon.
Panawagan sa karun sang mga Filipino sa Finland nga magresign si president Ferdinand ‘Bongbong’ Marcos Jr kag ibalik papauli si Duterte sa Pilipinas.
