Gin-athag sang station commander sang Bacolod Police Station 6 nga kun sa sulod pa sang establishmento ang isa ka customer kag wala pa kabayad sang ila ginkuha ang indi pa ini mahambal nga pagpangawat bangud kun kaisa bisan ginsulod pa sang mga ini sa bag ang items ginabayaran man mag-abot sa cashier.
Ini kasunod sang paglapta sa social media sang video sa isa ka grocery store sa Libertad Public Market kun sa diin ginkastigo sang gwardiya kag ginhanaan sang talinong ang duha ka solterito nga gina-alegar nagpangawat.
Sa interview sang Bombo Radyo Bacolod kay Police Captain Rosalino Pogoy, mahambal lamang nga nangawat ang isa ka persona kun nagwa lang sa baligyaan kag wala ginbaydan ang ginkuha nga items.
Suno kay Pogoy, ang gin-ubra sang gwardiya ang naghulat lang anay antes makagwa ang duha ka mga solterito agud nga mapamatud-an nga ini ang nagpangawat.
Suno sa station commander kun nagpangawat gid man kag napamatud-an sang gwardiya mahimo na sini dal-on sa police station.
Indi man dapat pagsakiton ang mga ini bisan pa nga indi maayo ang ila ginhimo.
Panugyan sini sa gwardiya nga dakpon lamang sa insakto ang gina-alegar nga nangawat kag turn-over sa mga kapulisan kag indi dapat pagsakiton.
Ginpahayag man sini nga may yara sang nagareklamo nga nakawatan apang indi man mapasakaan sang kaso ang nagkawat bangud kun marecover ang ginkuha wala naman ang mga ini nagapablotter.
Dugang pa ni Pogoy dapat nga buligan man sang mga biktima nga mapasakaan sang kaso ang mga suspek sa pagpangawat agud nga mapriso kag matapna ukon madula na ang insidente sang pagpangawat sa ciudad sang Bacolod.
