Nagpaggwa sang prebilihiyo nga writ of amparo ang Korte Suprema para sa pamilya ni Henry V. Tayo, Jr. nga nadula matapos mapriso sa Bacolod City Police Station 8 bangod sa kaso nga pagpangawat.
Sa Supreme Court En Banc decision, ang kapaslawan nga makapatigayon sang husto kag maidid nga imbestigasyon sa mga kaso sang wala gingusto nga pagkadula, ang paglapas ukon pagpanghangkat sa kinamatarong sang isa ka tawo sa kabuhi, kahilwayan kag seguridad.
Panindugan sini nga ang imbestigasyon ang dapat seryoso kag epektibo, indi para sa pormalidad lamang.
Pahayag sang kapulisan nga ginbuy-an nila si Tayo kag gintugyan sa lima ka Barangay Tanod kag kay Melleza Besana, isa sa mga nagreklamo.
Apisar nga may ginpakita ang kapulisan nga video ni Tayo nga nagapirma sang release book, wala ang mga ini makapakita sang video sang aktwal nga paghalin sa estasyon apisar sa hingyo sang pamilya Tayo, Commission on Human Rights (CHR), kag Public Attorney’s Office (PAO).
Ang Pamilya Tayo ang nagfile sang petisyon para sa writ of amparo nga nagahingyo sa Regional Trial Court (RTC)sang pagpanaog sang production order sa mga kapulisan.
Nagpagwa naman ang RTC sang writ of amparo nga nagamando sa kapulisan nga magsabat sa sulod sang 72 oras.
Sa sabat sang Bacolod City Police Station 8, napaslawan ang Pamilya Tayo nga pamatud-an nga ang mga pulis ang may salabton sa pagkadula ni Tayo ukon may ginatago nga impormasyon sa lokasyon sini.
Ginbasura sang RTC ang pribilehiyo sang writ of amparo kag ginpanindugan nga wala sang nakita nga paglikaw sang kapulisan nga maghatag sang impormasyon sa kun diin si Tayo ukon nga sila ang may kaangtanan sa pagkadula sini.
Ginsuli naman sang Korte Suprema ang desisyon sang RTC kag ginhatag ang pribilehiyo sang writ of amparo sa pamilya Tayo.
Sa idalom sang Section 17 sang Rule, ang public officials nga nagasabat sa petisyon para sa writ of amparo ang dapat maghimo sang pagtinguha sa pagtuman sang ila salabton, kaangay sang imbestigasyon sa pagkadula kag pagpagwa sang impormasyon, kag suno sa Korte, napaslawan ang kapulisan nga magpakita sang pagtinguha sa pagtuman sa mando.
Samtang, Ginmandoan sang Supreme Court ang National Police Commission (NAPOLCOM) Region 6 nga magpatigayon sang ‘full blown investigation’ angot sa pagkadula ni Henrry Tayo Jr.
Sang tuig 2022, gindakop sang Bacolo Police Station 8 si Tayo bangod sa pagpangawat apang ginrelease matapos ang reglementary period sang wala man sang may nagpasaka sang kaso batok sa iya, apang tubtob sadto wala na ini nakapauli pa.
Sa intevriew sang Bombo Radyo kay Atty Michelle Benitez Yotoko, tagpamaba sang National Police Commission Region 6, nabaton nila sang Enero ang instruction halin sa SC kag sang Pebrero nagpadulong sila sa Bacolod Police Station 8 para magconduct sang imbestigasyon.
Suno diri, may tatlo ka personnel nga gindeklarar ang Supreme Court nga responsible kag accountable sa pagkadula ni Tayo.
Ini amo sanday anay Bacolod Police Station 8, station commander Police Lt. Col. Joery Puerto, ang investigator on case kag desk officer.
Gina-imbestigaran sa karun kun may liability ang tatlo kag kun may yara man, sila ang dagdagan sang nagakaigo nga administrative charges.
