Padayon nga ginareklamo sang pumuluyo sang East Homes 2, Brgy Estefania, Bacolod City, sa mas naglala nga problema nila sa supply sang tubig.
Madumduman nga ginpadulongan sang Bombo News Team ang lugar kasunod sa reklamo nga halos wala na nagatubod ang tubig.
Ginbutangan sang Bacolod City Water District (Baciwa)-PrimeWater sang gripo ng bayan ang mga pumuluyo apang halin kaagahon tubtob kagab-ihon ang pila sang mga residente dala ang ila mga balde.
Sa interview sang Bombo Radyo kay Irene Lee, residente sa nasambit nga lugar, nagpadulong ang Baciwa-PrimeWater para tsekyaron ang area kag ang solusyon sa karun amo nga ginpahinay ang tubod sa gripo ng bayan agud makasaka ang tubig sa tanke kag matigayon nga magtubod ang tubig sa tagsa ka mga panimalay.
Suno kay Lee, ang problema nga nakita amo nga madamo sang consumers apang madutay ang supply sang tubig.
Sila ang ginpasaligan man nga may kuhaon nga supply halin sa Brgy Granada kag may yara sang dugang nga tanke nga ibutang, apang tubtob sa karun wala man sa gihapon nasolsuyonan ang ila problema sa tubig nga mas naglala na gid subong.
