Nakilala na ang nasapwan nga bangkay sang lalaki sa katubuhan sa Barangay Cabacungan, La Castellana, Negros Occidental sang Sabado, Marso 22.
Ginkilala ini kay alyas El Wel, 45 anyos, single, laborer kag residente sang Sitio Buragwak, Barangay Manghanoy, La Castellana, Negros Occidental.
Sa interview sang Bombo Radyo Bacolod kay Police Major Rhojn Darrel Nigos, hepe sang La Castellana Municipal Police Station, natumod ang identity sang bangkay bangud ginpadulungan sang magulang sang biktima nga babayi ang lugar kun sa diin ini nasapwan bangud ginapangita man sang mga ini ang ila utod nga wala na kapauli humalin sang Marso 12.
Suno kay Nigos, nakilala man ini paagi sa koordinasyon sa mga barangay kun may nadula ang mga ini nga mga residente kag paagi man sa bayo nga nasuksok sini.
Suno sa hepe, ginahulat pa sang mga ini ang resulta sang autopsy report sang Scene of the Crime Operation team sa gintunaan sang kamatayon sini.
Indi man mapahayag nga may foul play bangud ginahulat pa ang resulta sang autopsy.
Ang biktima ang wala man sang mga kaso kag wala man kaagi priso apang ginapahayag nga madamo ang nasuya sa iya bangud madamo man ini sang nakalalis sa tion nga makainum.
Nagapadayon sa karun ang imbestigasyon sang La Castellana Municipal Police Station agud nga matumod ang motibo sa pagpatay sa biktima kasubong man ang may kahimuan sa krimen.
