Ginalantaw sang Human Rights lawyer nga luyag ni Vice President Sara Duterte nga malakip sa legal counsel ni former President Rodrigo Duterte agud ini ang may access sa iya amay.
Nahibaluan nga tubtob sa karun, nagapabilin gihapon sa Netherlands ang Bise Presidente kasunod sang pag-aresto sa iya amay sang International Criminal Court bangod sa alegasyon sang crimes against humanity.
Sa interview sang Bombo Radyo Bacolod kay Atty Cesar Beloria, kun indi mangin legal counsel si VP Sara indi ini makatinir sang malawig sa Netherlands bangod siya ang may responsibilidad bilang Bise Presidente sang Pilipinas.
Suno diri, kun makabahin sa legal team si VP Sara, siya ang mapahanugutan nga makaatubang sa iya amay.
Paathag ni Beloria nga global standard sa mga korte, nga nagahatag sang visiting hours para sa rights to counsel.
Dugang pa sini nga sa tion sang emerhensya, ang abogado ang sarang makabisita sa akusado bisan pa sa kagab-ihon.
Sa pihak nga bahin, ginahatagan pa sang tyansa ang kampo ni Duterte nga marefute ukon magdepensa batok sa 181 ka ebidensya nga ginpresentar sang prosecution team sa ICC Pre-Trial Chamber 1.
Sa masunod nga hearing sa Setyembre 23, kinahanglan nga makumbinser sang legal team ni Duterte ang korte nga wala sang kamatuoran ang pila ka mga ebidensya ukon magpangita man sang ebidensya nga makakontra diri.
Kun makumbinser ang korte nga wala sang bug-at ang mga ebidensya sang prosecution team, mahimo nga ibasura ang kaso.
