Luyag sang amay sang suspect nga nagbuno sa kaugalingon nga tiyo sa Prk Kawayanan 2 Phase 6B Brgy Handumanan, Bacolod City, Negros Occidental sang Lunes, Marso 31 sang gab-i, nga madakpan ini kag mapriso agud indi na makahimo pa sang kalainan.
Sa interview sang Bombo Radyo Bacolod kay Roberto Tiopes, amay sang 32 anyos nga suspect nga si Domingo Tiopes, wala ini makahibalo nga bun-on sang anak sini ang iya nga pakaisa.
Ang biktima ang ginkilala naman nga si Ringgo Buenaflor, 52 anyos, single, mekaniko residente sang Purok Mabinulugon 2, Barangay Handumanan.
Suno kay Roberto antes pa man ginbuno sang suspect ang biktima may nabatian na ini nga nagaridongkadol sa likod sang ila balay.
Suno sa amay, wala man nila ini ginsapak pa apang gintawag ni Domingo ang iya pakaisa kag naghambal nga birahon sini ang ila tiyo.
Ginpamangkot man sang pakaisa sini ang suspect kun ngaa birahon sini ang tiyo nga wala man sang ginaubra nga malain sa iya ilabi na nga ini ang tigulang na.
Apang ginpalapitan sang suspect ang iya tiyo kag ginhambalan nga “Palangga tagid ka” kag ginbuno.
Suno kay Roberto, pagpangimon ang nakita sini nga motibo kun ngaa ginbuno sang iya anak ang biktima bangud halos tanan ang ginapangimunan sini bisan ang kaugalingon nga utod kag mga pakaisa.
Suno sa amay ang asawa sang suspek ang maayo man magsulsol sa bana sini kag madasig nga mangutos bangod nga gina-alegar nagagamit sang illegal nga druga.
Ginpahayag man sini nga ang suspek ang nakapalagyo bangud ginpasulod sang iya asawa sa ila balay.
Gintinguhaan pa sang mga police nga malagas ang suspect apang wala gid madakpan.
Gin-abisuhan sang amay ang asawa sang iya anak nga pasungkaon nalang ang bana sini agud nga indi na maglain pa ang madangtan kag indi naman makahimo sang kalainan.
