Isa patay samtang may pila ka mga pilason sa nagluntad nga shooting incident sa Purok Narra, Barangay Lopez Jaena, Murcia, Negros Occidental kagab-i, Abril 6.
Ginkilala kay Edgar Tabunoc Jr., 24 anyos samtang ang suspetsado ang ginkilala kay Arman Lanerez, 47 anyos, kasado, driver kag residente sang nasambit nga lugar.
Sa interview sang Bombo Radyo Bacolod kay Elma Tabunoc, iloy sang biktima, nagasakay ang mga ini sa tricycle bangud naghalin sila sa banwa apang sang naglabay ang mga ini sa balay sang suspetsado ginbutong sang suspek ang biktima kun sa diin nagluntad ang kumprontasyon.
Dugang pa sang iloy bangud wala sang padaog ang suspek, naggabot ini sang armas kag gintiro ang biktima sang gina-alegar makatatlo ka beses.
Ginalantaw sini nga motibo amo ang pagreklamo nila sa Barangay matapos nga gin-alegar nga sa dalan ginabutang sang pamilya sang suspetsado ang mga basura kag diri ginatuturan nga delikado sa mga nagalabay mga tricycle.
Gin-alegar man sini nga siya kag ang iya bata nga babayi ang gintiro man sang suspek apang wala naglupok ang armas.
Magluwas sa napatay sini nga anak may yara pa ini sang anak nga napilasan sa ulo.
Nagpalagyo man ang suspetsado apang gilayon man nga nadakpan sa ginpatigayon nga hot pursuit operation.
