Wala sang may naabtan nga meeting ang mga Pumuluyo gikan sa Barangay Cansilayan kag Barangay Dumpsite sa banwa sang Murcia matapos nga hinali nga ginsaylo ang venue sa kuntani pagsapol para sa isyu sa naga-alisngaw nga baho sang iti gikan sa Taala Farm.
Temprano pa nagpadulong sa Cansilayan Farm School ang mga residente agud kuntani magtambong sa meeting kag presentasyon sang solusyon sa problema, apang sila ang nalab-utan na lamang sang tatlo ka oras sa lugar, kag wala may nag-abot nga opisyal.
Madumduman nga una nga gin-anunsyar ni Murcia Municipal Mayor Gerry Rojas nga sila ang magapatigayon sang pagsapol upod sa tag-iya sang Taala Farm, mga concerned agencies lakip na ang Department of Environment and Natural Resources kag gin-imbetar man sini ang iban pa nga luyag magtambong.
Gani temprano pa nagpadulong sa lugar ang masobra 50 nga pumuluyo, kag wala man sang may nag-atubang sa ila nga opisyales sang Barangay.
Sa interview sang Bombo Radyo Bacolod kay Antonio Villarosa, residente sang Purok Orchids sa Brgy Cansilayan proper, may naggwa lamang nga school personnel nga amo ang nagsugid nga may impormasyon nga ginsaylo ang venue sa opisina sang alkalde ala-1:00 sang hapon, apang indi na imbetado ang mga residente nga nagareklamo.
Suno kay Villarosa, may laktan ini kuntani, apang ginpaiway na lamang sini bangod karun lang ang tyansa nga maka-atubang nila si Mayor Gerry angot sa isyu.
Pahanumdom sini nga nareklamo na sang 2023 ang kaangay nga isyu kag sila ang nagdangat na sa DENR.
May ginhatag naman nga mga rekomendasyon agud indi maglapta ang baho sang iti, apang kaangay nga wala man gintuman.
Mismo ang Bombo News Team ang makapamatuod sang pag-usbong sang indi mahangpan nga baho sang iti sa Brgy Cansilayan.
Panindugan sini nga wala sang kaangtanan sa politika ang ila reklamo, kag nakita man nila ang mga hinimuan sang alkalde para sa banwa.
Sa baylo, gusto lamang nila nga pamatian man sang alkalde ang ila reklamo, ang madugay na nga pag-antos sang pumuluyo, kag indi nga negosyante lamang ang ginapaboran.
Dugang pa sini nga wala man sila sang problema sa Taala Farm, kag ang panawagan lamang amo ang mauntat na ang pag-usbong sang baho sang iti.
Indi man nila luyag nga pinsaron nga sila ang ginapatalang sang alkalde, bangod luyag lamang nila sang sinsero nga solusyon sa ila problema.
