Halos wala pa magsink-in sa isa sa Top 1 sa April 2025 Electronics Technicians Licensure Examination nga graduate sang Technological University of the Philippines-Visayas nga ini ang nakapasar na kag nagtop pa.
Sa interview sang Bombo Radyo Bacolod kay Jan Frederick Alegado Valenton, asta subong wala pa nagsulod sa systema sini nga isa na siya licensed Electronics Technicians.
Suno kay Valenton duha ang ginkuha sang mga ini nga licensure examination kun sa diin napasaran man nila ang April 2025 Electronics Engineering Licensure Examination.
Wala man ini magdahom nga magaTop sila sa nasambit nga pasinawan.
Nalipay man ini nga nalipay ang iya ginikanan kasubong man ang iya pamilya matapos nga isa na ini ka Engineer.
Ginpahayag man sini nga iya lamang ginikanan ang yara sa sulod sang pinsar sini sang ini ang magkuha sang Licensure Examination.
Dako man ang pagpasalamat sini sa TUP-Visayas, sa review center kasubong man sa tanan nga nagsuporta sa ila nga journey sa pagkuha sang ila mga lisenya.
Dugang pa sini nga ginhimo lamang nila ang ila nga best agud nga makapasar sa nasambit nga pasinawan.
Luyag man sini mag-apply sa semi-conductors company bangud tinutuyo gid sini nga ipursue ang electronics engineering.
Ginpahayag man sini nga kinahanglan nila nga magserbisyo sa Pilipinas sa sulod sang apat katuig bangud isa man ini sa scholar sang Department of Science and Technology ukon DOST.
