Estable na ang kondisyon sang isa ka negosyante nga nakastiguhan sa sulod sang bar sa Brgy Mandalagan, Bacolod City apang desidido nga magpasaka sang kaso batok sa tatlo tubtob lima ka persons of interests nga nagkastigo sa iya nga gina-alegar mga tricycle drivers.
Hungod nga wala ginhingadlan ang negosyante kasunod man sa pag-ayo sini nga indi na pagwaragwag ang pangalan sini.
Suno sa report bangud sa kahulugbon ang nasambit nga negosyante antes pa man natabo ang pagpangkastigo sa iya gin-alegar nga nagpangdapal na ini sa sulod sang bar.
Ginalantaw nga mahimo nga may butang man nga ginhimo ukon ginhambal ang negosyante nga nakatrigger sa ginapahayag nga tricycle drivers agud ini ang makastiguhan.
Sa interview sang Bombo Radyo Bacolod kay Police Major Rodnyl Tapang, station commander sang Bacolod Police Station 3, nagrequests na sila sang CCTV apang sa Lunes pa mahatag bangud indi pa available ang IT.
Suno kay Tapang, nagapaayo na ang negosyante kag ginahulat nalang ang pagsasaka sang mga ini sang kaso kun sa diin igaassists man sang mga kapulisan.
Maayo naman ang condition sang biktima kag ginaobserbahan pa sang doctor.
Magadepende pa sa makita sa certification nagikan sa doctor ang igafile nga kaso batok sa gina-alegar nagkastigo sa biktima.
