Nakagwa na sa Bacolod Police Station 2 ang gwardiya nga gin-alegar nagtiro sa isa ka lalaki nga nasal-an nga nagpangawat sa isa ka Korean apartment sa dalan Lacson sa bahin sang Barangay 7, Bacolod City, sang Sabado sang kaagahon, Abril 12 bangud natapos na ang reglementary period.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, ginbuy-an nalang nila ang gwardiya bangud wala man nahingagaw pasaka ang kaso batok diri.
Suno kay Tolentino ang ulihi nga nabatian sini nagikan sa pamilya sang biktima nga si Ronald Guillermo, 23 anyos, residente sang Purok Nangka, Brgy. 3, Bacolod City nga ginaestoryahan pa nila ang pagpasaka sang kaso.
Suno diri, nakig-angot naman gani sila sa prosecutor agud nga mapasaka ang kaso apang wala man nadayon bangud wala man nagpakita ang pamilya.
Apang gin-athag man sini nga mahimo sagihapon makapasaka sang kaso ang pamilya sang biktima.
Nakita naman sa death certificate sang biktima nga igo sang bala ang samad sini nga ginapahayag gintunaan sang kamatayon sini.
Ginpahayag man ni Tolentino nga nagwa na ang resulta sang autopsy report sang biktima kag mahimo nga ginauyatan na ini sang iya nga pamilya.
