Duha ka lalaki ang ginalantaw nga nagluthang-patay sa Brgy Tanod nga si Grace Rabala kaina sang kaagahon sa sa Brooksville 2, Yolanda Housing Project Brgy. Punta Salong, Manapla.
Sa interview sang Bombo Radyo kay Police Major Robelito Mariano, hepe sang Manapla Municipal Police Station, may yara sang nakakita nga duha ka lalaki ang suspek sa pagpatay apang wala nakilal-an bangod may mga tabon ang ila nawong.
Suno diri, matapos ang insidente, gilayon lang nga nagsakay sa motorsiklo ang duha kag nagpalagyo sa area.
Pahayag ni Mariano, may yara sang nagahambal nga asset sang kapulisan si Rabala apang indi ini matuod bangod bisan sin-o sa area ang pamangkoton kun sin-o ang involved sa illegal nga druga, may yara gid sang mga tawo nga makasugid bangod kilala man nila ang mga ini.
Pahayag ni Mariano, basta may yara sila sang operation batok sa illegal nga druga, wala nakahibalo ang mga tawo kun sin-o ang naghatag sang impormasyon sa mga kapulisan.
Dugang pa sini, gina-imbestigaran pa sa karun ang matuod nga motibo sa pagpatay kag isa sa ginatun-an amo ang rekord ni Rabala sa Brgy kun sa diin may yara ini sang ginareklamo kag may yara man sang nagareklamo batok sa iya.
