Asod asod ang sunog nga nagluntad sa ciudad sang Bacolod kahapon nga nagdangat sa minilyon ka pesos ang ginbilin nga kahalitan.
Sa interview sang Bombo Radyo Bacolod kay Fire Officer 2 Rolin Paulan, Fire Chief Investigator sang Bacolod City Fire Station, duha ang narecord nga sunog kahapon kag ini ang ginalakipan sang, una ang House of Glory Foursquare Gospel Church sa Purok Sambag, Brgy. Mandalagan, Bacolod City.
Suno kay Paulan, nagresponde ang mga fire personnel alas-3:50 ang takna sang kaagahon kag nafire-out alas-3:55 kahapon sang kaagahon.
Ang nasambit nga simbahan ang totally damage kun sa diin ang halit ang nagdangat sa P1,500,000.
Suno kay Paulan, electrical ignition ang ginalantaw nga rason sang sunog bangud daan na ang electrical wires kag madamo na sang splicing.
Nadiskubrehan man sa points of origin nga ginatuluan ini sang tubig santo man sa panaysayon sang pastor gani mahimo nga madamo na ang nagluntad nga short circuits.
Nagdangat ang kahalitan sang sunog sa P1.5 million bangud ang simbahan ang semi furnished.
Samtang sa pihak nga bahin apat naman ka balay ang apektado sang sunog nga nagluntad man kahapon sa B23, Lot 10 Purok Progreso, Zone 2, Abada Escay, Brgy. Vista Alegre, Bacolod City.
Suno kay Paulan nagresponde ang mga bumbero alas-6:54 ang takna sang aga kag nafire-out alas-6:59 ang takna sang aga.
Ang balay nga una nga nasunog ang ginapanag-iyahan ni Rosalie Sederio, apang naglaton sa mga balay sang kaingod sini.
Bangud sa sunog duha ang balay ang totally damage kag duha man ang partially damage kag ang kahalitan ang ginabanta nagadangat sa P1.2 million.
Suno kay Paulan sa karun nagapatigayon pa sila sang paginterview sa mga witness kag nagakuha sang ebidensya para sa confirmatory test.
May yara naman sila sang inisyal nga gintunaan sang sunog apang indi pa nila mapakigbahin sa publiko.
Inisyal man nga gina-alegar nga ginhungod ang sunog ukon Arson apang nagapatigayon pa ang mga ini sang maidid nga imbestigasyon kun sa diin nagakuha ang mga ini sang statement sa witness kag ginaverify man sa iban nga kaingod kag gina-amat amat naman nila dula ang nasambit nga alegasyon.
Nagpanugyan man si Paulan nga siguruhon nga indi maoverheat ang mga aircon kag electric fans agud nga malikawan ang sunog ilabi na nga tuman kainit ang panahon sa karun.
