Gilayon nga ginpuhag sang Bacolod City Police Office (BCPO) personnel ang nagtipon nga grupo sang drivers kag operators sang mga unconsolidated traditional jeepneys sa Bacolod City Government Center ground nga nagwelcome kay Department of Transportation Secretary Vivencio “Vince” Dizon.
Madumduman nga nagsapol si Dizon kanday Bacolod City Mayor Alfredo “Albee” Benitez, Congrssman Greg Gasataya, kag mga Regional Directors sang Land Transportation Office (LTO) kag Land Transportation Franchising and Regulatory Board (LTFRB).
Sa interview sang Bombo Radyo Bacolod kay BCPO Director Police Col. Joeresty Coronica, ginakabig sini nga rally without permit ang ginhimo nga pagtipon sang madamo nga mga drivers kag operators.
Suno diri, apisar nga ginapahayag sang Bacolod Alliance of Commuters, Operators and Drivers (BACOD) kag Lilian Sembrano sang Kabakod Negros Transport Coalition Incorporated (KNETCO) nga ginawelcome lamang nila si Dizon, ang bisita ang mahimo makabatyag sang threat ilabi na nga madamo sang isyu angot sa Public Utility Vehicle Modernization Program.
Paathag sini nga nakita na nila ang kapasidad sang transport group sa paghimo sang kinagamo matapos sang natabo nga protesta sa atubang sang L’Fisher hotel.
Gani ginatindugan sini nga apisar maayo ang resulta kag gin-atubang sila ni Dizon, rally without permit gihapon ang ila nga ginhimo.
Ini man ang rasun nga ginpuhag na ang mga ini, ilabi na nga natapos naman ang pahayag nga purpose nga pagwelcome sa Transportation Secretary.
