Nadul-ong sa iya ulihi nga palahuwayan ang lider sang Simbahan Katolika nga si Pope Francis subong nga Sabado, Abril 26.
Pribado kag simple ang ginpatigayon nga seremoniya sa pagpalubong sa Santo Papa sa Saint Mary Major Basilica kaangay sang ginhingyo sini.
Gin-imbetaran man ang isa ka grupo sang mga marginalized people nga magpila sa ulihi nga palahuwayan sang Santo Papa sa Basilica di Santa Maria Maggiore sa katapusan sang funeral procession.
Sa iya nga final testament, ginhingyo ni Pope Francis nga malubong sa tunga sang Chapel of the Salus Populi Romani at Sforza Chapel, nga makita sa Basilica of Saint Mary Major sa Roma sabaylo nga sa Grotto sa St. Peter’s Basilica.
Si Pope Francis ang labing-una nga Santo Papa nga ginlubong sagwa sang Vatican sa sulod sang halos 100 na ka tuig.
Ginpangayo man sang Santo Papa nga mangin simple ang lulubngan nga wala na sang partikular nga ornamentation kag inscription lamang nga Franciscus.
Ang St. Mary Major ang espesyal sa nagtaliwan nga Santo Papa bangud sa iya nga debosyon kay Maria iloy sang Diyos.
Diri nagapangamuyo si Pope Francis antes kag pagkatapos sang iya biyahe sang iban nga pungsod.
Samtang nauna na nga gin-anunsyar sang Vatican nga mahimo nga bisitahon sang publiko ang lulubngan ni Pope Francis humalin sang Domingo sang aga, Abril 27.
