Nakilala na ang duha ka mga bangkay sang mga lalaki sa sulod sang kampo sa Hacienda San Roque, Barangay Cubay sa ciudad sang La Carlota, Negros Occidental kahapon sang aga.
Sa interview sang Bombo Radyo Bacolod kay Police Captain Rosinie Cabuena, Deputy Chief of Police sang La Carlota City Police Station, ang duha ka mga bangkay ang ginkilala nga sanday Ernesto Jawud, alyas Atong, 32 anyos kag Glenn Arnaiz, alyas Follow Up, 29 anyos, lunsay mga residente sang Barangay 6, Bacolod City.
Suno kay Cabuena ang mga bangkay ang gintumod mismo sang ila mga live-in partners.
Sa inisyal nga impormasyon ang duha ang kilalahay lamang apang wala pa gid mahibaluan kun ano gid ang relasyon sang mga ini.
Sa karun nagapadayon pa ang imbestigasyon sang La Carlota City sa nasambit nga kaso agud nga matumod ang motibo kag may kahimuan sa pagpatay.
Una na nga ginpahayag ni Cabuena nga ang mga bangkay ang may yara sang lagob ukon signs of hematoma nga posible tuga sang pagpangastigo.
Ginahulat man ang resulta sang post mortem examination agud nga matumod ang gintunaan sang kamatayon sang mga biktima.
