Nagdangat sa 104.6 billion US dollars ang gross international reserves (GIR) sang pungsod tubtob sa katapusan sang Abril subong nga tuig, suno sa Bangko Sentral ng Pilipinas (BSP).
Sa preliminary data nga ginpagwa sang BSP sang Miyerkules sang gab-i, nakita nga ang GIR sa nasambit nga bulan ang nagnubo gikan sa 106.7 billion US dollars sadtong katapusan sang Marso 2025.
Ang international reserves nga ginatumod man bilang GIR ang foreign assets sang BSP nga kinaandan nga ginatago bilang investments sa foreign-issued securities, monetary gold, kag foreign exchange.
Sa pihak sang pagnubo, ginpahayag sang BSP nga ang pinakabag-o nga lebel sang GIR ang nagahatag sang mabakod nga external liquidity buffer, nga kabaylo sang 7.2 ka bulan sang importasyon sang mga baligya kag bayad para sa mga serbisyo kag nagapanguna nga kita.
Ang GIR ginakabig nga bastante gani sarang sini nga sustentuhan ang indi magnubo sa tatlo ka bulan nga balor sang importasyon sang pungsod sang mga baligya kag bayad para sa mga serbisyo kag nagapanguna nga kita.
