Kadungan sa pagtakop sang campaign period, magasugod naman ang implementasyon sang liqour ban may kaangtanan sa 2025 National and Local Elections.
Sa interview sang Bombo Radyo Bacolod kay Police Lt. Col. Joem Malong, public information officer sang Regional Election Monitoring Action Center sang Police Regional Office – Negros Island Region, ang liqour ban, sa idalom sang Commission on Election resolution no. 11057 ang ipatuman humalin alas-12:00 sang kaagahon bwas, Mayo 11 tubtob alas-11:59 sang Mayo 12, adlaw sang eleksyon.
Kun sa diin hugot nga ginadumilian ang pagbakal, pagbaligya kag pag-inom sang makahulubog nga ilimnon sa gwa sang balay.
May mga establishimento man kaangay sang hotel kag restaurants nga makarequest sang exemption sa Comelec sa pagbaligya sang makahulubog nga ilimnon.
Apang ang mga establishimento nga certified sang Department of Tourism ang sarang lamang nga maka-offer sang alcoholic drinks sa mga foreign nationals.
Samtang ang application para sa exemption ang nagtakop naman sang Mayo 5.
Sa ila nga meeting upod sa Comelec kahapon, kalakip man sa preparation ang estrikto nga pagpatuman sang liqour ban.
Suno kay Malong, ang madakpan nga nagalapas sa liqour ban ang mahimo mangatubang sang isa tubtob anom ka tuig nga pagkapriso, madulaan sang voting rights kag may permanent disqualification sa pagkapot sang ano man nga public office.
Pangabay sini sa pumuluyo nga magkooperar na lamang sa kapulisan kag magbawi na lamang sa pag-inom kun matapos na ang banning period.
Ang liqour ban ang ginapatuman agud malikawan ang kinagamo sa adlaw sang piniliay, bangod sa masami ang mga hubog amo ang nagatuga sang public disorder.
