Ginpanginwala sang Silay City Police Station ang naggwa nga social media post nga nagapahayag nga ginpaidalom sa martial law ang Silay City.
Nahibaluan nga nagpost ang facebook account nga ‘Silay Alert’ nga nagapahayag nga may mga armado nga nakabonnet kag nagatiyog agud pahugon ang mga anti-administration sa duha ka hacienda.
Dugang pa sini nga nagpatuman sang quarantine ang alkalde agud wala sang makasulod kag makagwa sa lugar.
Pahayag sini nga tuman ang kahadlok sang mga pumuluyo sa nagakatabo nga pagpamahog.
Ini ang gilayon man nga gin-imbestigaran sang Silay City Police Station.
Sa interview sang Bombo Radyo Bacolod kay Police Lt. Col. Mark Anthony Darroca, hepe sang Silay City Police Station, gincontact nila ang nagpost nga account, apang ini ang wala nagasabat.
Samtang ginpadulungan man nila ang gina-alegar mga apektado nga Hacienda, nga ginalakipan sang Hacienda Chona kag Nily sa Barangay Lantad, Silay City apang wala man sang may nakasugid nga may kaangay nga hitabo.
Paathag ni Darroca nga wala sa kontrol sang militar ang Silay City.
Ang kaso ang gin-endorso na nila sa PNP Anti-Cybercrime Unit agud matumod kun sin-o ang nagapanag-iya sang account nga nagpost.
Suno kay Darroca, tuman ka malisyoso sang post kag ini ang makatuga sang pagkahadlok sang mga pumuluyo.
Nagapati ang hepe nga may kaangtanan sa politika ang katuyuan sang social media post.
Panawagan na lamang sini sa mga pumuluyo nga icheck gid kun matuod ukon indi ang mga mabasahan sa social media.
Ini bangod madamo sang mga ginagamit ang moderno nga teknolohiya agud makapalapta sang sala nga impormasyon ukon fake news.
Panawagan man sini nga dapat mangin patas sa subong nga eleksyon kag indi magpost sang makatuga sang patalang ukon kakugmat sa mga tawo.
