Nagpanawagan ang legal counsel sang Team Asenso- Silay City sa kapulisan para sa impartial kag legit nga imbestigasyon sa nagluntad nga shooting incident.
Sa interview sang Bombo Radyo kay Atty Jose Edward ‘Chikoy’ Davila, kahapon may yara sila sang nabaton nga report halin sa Brgy 2 nga may yara sang mga tawo nga nagsakay sa puti nga Toyota HiAce nga nanaog kag nagtinguha nga sudlon ang balay nga ginapanag-iyahan sang pamilya Lacson.
Samtang, kaina sang aga may nagreport man sa iya nga may pagpangharass man nga nagluntad sa bahin naman sang Brgy Guinhalaran kun sa diin ang may yara sang isa ka miyembro sang Team Asenso ang gin-attempt nga agawon ang iya bag sang isa ka moyembro sang Team Ugyon.
Suno diri, ang puti nga van nga may tabon ang template nga nagalibot sa ciudad apang ginapabay-an lang sang kapulisan nga nagalibot-libot sa ciudad kag naglabay pa sa atubang sang patrol vehicle.
Pahayag ni Davila, ang balay nga ginabantayan sang volunteers sang Team Ugyon ang isa ka private property nga ginpahulam sa supporters sang Team Asenso kag gin-athag sini ga indi ini official headquarters.
Ini ang ginagamit lamang sang mga kandidato para magpahuway-huway ukon lugar kun sa diin sila nagatiliipon kag nagakinaon.
Suno pa diri, indi mahimo nga masulod sang kapulisan ang balay bangod wala sila sang search warrant kag ang tawo sa sulod ang mga caretakers lamang.
Dugang pa ni Davila, kaina sang kaagahon pa sila nagtawag sa pulis para mangayo sang bulig bangod may yara sang mga nagatipon nga tawo nga nakabonnet sa gwa sang balay.
Pahayag ni Davila, handa sila nga magkooperar sa natabo kag nagpanawagan sang impartial investigation.
