Nagpangayo sang pasaylo ang amay sang ginatudlo nga suspek nga nagbuno-patay sa 18 anyos matapos ang pagsinuyaay nga nagresulta sa pagpangastigo kag pagpamuno sa Dalan Lacson, Barangay Mandalagan, Bacolod City.
Ang biktima ang ginkilala nga si Yuri Legaste, 18 anyos, residente sang Barangay Efegenio Lizares, Talisay City, samtang ang nagbuno ang ginkilala naman nga si Adrian Cagayao.
Sa interview sang Bombo Radyo Bacolod kay Ernesto Cagayao, amay ni Adrian Cagayao, suno sa pahayag sang iya anak nga si Adrian nga una ginharass ang upod sini kun sa diin gintuyo nga bun-on apang wala maigo.
Suno sa amay ginhandos man ang iya anak sang kutsilyo apang wala ini maigo kag natapi sini ang kutsilyo.
Sang mahulog ang kutsilyo, ginpulot ini ni Adrian kag nagatabok sa dalan apang ginkadtuan pagid ini kun sa diin nagluntad ang kinagamo.
Matapos ang insidente nakapauli ang iya anak apang naglakat man dayon kag wala na ini makahibalo kun sa diin ini nagpadulong.
Ayawan man contact ang amay sa bata kag gin-engganyo man sini ang iya anak nga magsungka.
Nagpangayo man ini sang pasaylo sa ginikanan kag pamilya sang nalisdan kag handa man ang mga ini magpadangat sang bulig.
