Nagpaandam ang Bacolod City Legal Office sa mga establishmento nga wala pa sang business permit nga ang Business Process and Licensing Office ang nagamonitor kag aktibo ang pagpasira sa mga ini.
Ini matapos nga matukiban nga wala sang business permit ang Cista Bar.
Ini ang bar kun sa diin ginbuno kag napatay ang si Hikaru “Yuri” Legaste nga residente sang Brgy. Efigenio Lizares, Talisay City sang Mayo 13 sang kaagahon.
Sa interview sang Bombo Radyo Bacolod kay Atty. Karol Joseph Chiu, nakabaton sila sang report nagikan sa Punong Barangay sang Barangay Mandalagan, Bacolod City angot sa bar bangud man sa mga nabaton sini nga reklamo.
Bangud sini, ginpatsekyar sini sa BPLO ang business permit sang nasambit nga establishmento kag didto nahibaluan nga on process sagihapon ang business permit application.
Suno sa City Legal Officer natapos na ang extension sang pag-apply sang business permit kag wala sang mga ini natapos proseso.
Apang boluntaryo naman nga nagpanira ang nasambit nga bar kag nagpahayag nga makuha anay sila sang business permit antes liwat nga magbukas.
Nagpanugyan man ini sa tanan nga mga tag-iya sang business establishment nga dapat siguruhon nga may yara sang business permit antes mag-operate bangud ini ang obligasyon sang isa ka negosyante.
