Madasig nga naghulag ang mga residente sa Purok Lison, Barangay 1, Bacolod City sa pagbulig nga matapna ang kalayo sa nagakasunog nga balay pasado ala-1:00 kaina sang kaagahon.
Napatay ang anom ka tuig nga babayi kag walo ka tuig nga lalaki nga mag-utod sa nasambitan nga sunog.
Ang duha ka kabataan lamang ang nabilin sa balay matapos maggwa ang iloy agud magbakal sa fastfood sa request man sang iya nga bata.
Samtang bulagay naman ang ginikanan sang mga bata, kun sa diin ang ila amay ang nagapuyo sa lain nga balay, apang sa kaangay lamang nga compound.
Sa interview sang Bombo Radyo Bacolod kay Carlito Patoga, kaingod sang mga biktima, sang makita sini ang kalayo, gilayon niya nga ginpagwa ang mga nakastock nga tubig sa ila balay.
Suno diri, masami na ini nga nakastock sang tubig, agud magamit sa ila CR, gani ini na lamang ang iya una nga gingamit.
Tubtob nga nagdamo na ang nagbulig, kun sa diin kalabanan ang nagkuha sang tubig sa bomba malapit sa lugar.
Gin-utod man nila ang hose sang BACIWA-Prime Water agud may kuhaan sang dugang nga tubig para sa emerhensya.
Suno kay Patoga, ginasinggitan lamang sini sa mga kaupod nga indi tumbahon ang kudal sang balay, agud indi maglatay ang kalayo sa kaingod.
Ginakasubo sini sang mahibaluan nga wala makagwa sa balay ang duha ka kabataan.
Ginalantaw nga kandila ang ginhalinan sang sunog bangod brownout na sa area halin pa lamang alas-9:00 sang gab-i.
