Halos nakumpleto na sang Bacolod Police Station 4 ang mga papeles agud nga mapasaka ang kaso batok sa suspek nga nagtiro-patay sa isa ka lalaki sa Barangay 27, Bacolod City sang Biyernes sang gab-i.
Madumduman nga patay ang ginaalegar notorious nga kawatan matapos ginluthang-patay sa Purok Cheriza 1, Barangay 27, Bacolod City sang Mayo 16 sang gab-i.
Ang biktima ang ginkilala nga si Alyas Cesar residente sang Barangay Handumanan, Bacolod City.
Nahibaluan nga antes pa man natabo ang krimen ang abyan sang suspek ginkadis sang biktima sa ulo sang dala sini nga kahoy.
Nagpanugid ang abyan sang suspek kag pagkagab-i ginbalikan sini ang biktima dala ang baseball bat kag iya ini ginlampusan.
Nagpalagyo ang biktima kag sang kaangay nga indi na sini maabtan ang biktima, iya ini gintiro.
Samtang may nakit-an naman nga duha ka sachet sang illegal nga druga sa kamot sang biktima.
Suno kay Police Major Elmer Bonilla, station commander sang Bacolod Police Station 4, padayon pa ang ila backtracking sa background ni Alyas Cesar.
Malapit nalang makumpleto ang mga papeles agud nga mapasaka na ang kaso batok sa suspetsado nga nagtiro-patay sa biktima.
Suno kay Bonilla ginahulat nalang ang statement sang complaint sang pamilya agud nga mapadala ang mga dokyumento sa opisina sang fiscal.
Mahimo nga subong nga semana mapasaka na ang kaso sa suspek nga wala na ginpangalanan sa kahanginan.
Wala pa man nahibaluan ang kalibre sang armas ang gamit sang suspek bangud wala pa nakagwa ang report sang Scene of the Crime Operation.
Personal grudge ang ginalantaw nga motibo sa krimen.
