Patay ang isa ka lalaki nga nagamaneho sang iya motorsiklo matapos nga mapilpilan sang natumba nga poste sang kuryente sang Northern Negros Electric Cooperative (NONECO) kapin alas 3:00 ang takna kaina sang hapon sa Cadiz City Public Market.
Nadalahig man ang pila ka mga tricycle nga nakaparada sa lugar kun sa diin ini natumba.
Bangud sa insidente gin-anunsiyar sang electric cooperative ang nadulaan sang supply sang kuryente ang pila ka mga barangay tuga sang pagkatumba sang primary line sang kuryente.
video credits to rightful owner
Apektado ang mga Brgy. Zone 1; Brgy. Zone 3; Brgy. Zone 4; Brgy. Zone 5; Brgy. Zone 6; Portion sang Brgy. Zone 2; Portion of Brgy. Daga; kag Portion sang Brgy. Banquerohan, Cadiz City,Negros Occidental
Sa interview sang Bombo Radyo Bacolod kay Ezekiel Kate Escares, Officer-in-Charge sang Cadiz City Disaster Risk Reduction Management Office, dead on the spot ang biktima.
Suno kay Escares, natumbahan sang poste ang lalaki matapos nga maglabay bangud nasanggit sang mixter truck ang wire sang steel post.
video credits to rightful owner
Ang biktima ang ginapahayag nga residente sang Barangay Cabahog, Cadiz City kag wala pa sang pangalan bangud padayon pa ang ila nga pagtipon sang data.
Nagapadayon sa karun ang imbestigasyon sang Cadiz City Police Station.
Ginahibalo pa sang mga ini kun ano gid ang gintunaan sang kamatayon sang biktima bangud inisyal nakita nga nagtupa ang natumba nga poste sa likod sini samtang ginalantaw nga secondary nga rason sang iya kamatayon ang nakuryente ini.
