Halos indi makapati ang iloy sang babayi nga napatay matapos nga magbun-anay ang maglive-in sa Purok Eucalyptus, Barangay Tabugon, Kabankalan City, Negros Occidental sang Martes sang hapon.
Sa interview sang Bombo Radyo Bacolod kay Leonela Santiyamian, iloy sang biktima nga si Marilie Satinyamian, 26 anyos, indi pa ini magpati sang ginsugidan sang iya apo nga napatay na ang iya ginikanan.
Suno kay Santiyamian, ginpadulungan sini ang balay kag nakita sini nga wala na sang kabuhi ang iya bata kag madamo sang pilas tuga sang pagpabuno.
Suno sa iloy, nakita pa sini ang lalaki nga nagatinga-tinga pa.
Pahayag sini nga sa tion nga mag-away ang duha, ang lalaki ang masami nagapauli lanmang sa iya pamilya, gani ginkakibot gid sini ang natabo.
Masami nga ginaawayan sang duha amo ang pagpakay-o sang ila nga puluy-an, kun sa diin ginaayo sang babayi ang lalaki nga magtapas sang kahoy agud nga makay-o na ang balay apang masami nga nagabalibad ang lalaki kag nagahambal nga angan-anganon lamang bangod siya ang may ginatrabaho pa.
Ginakasubo sang iloy kun ngaa ginpadako gid sang duha ang gamay nga butang nga ila gina-awayan.
Sang temprano pa, ginapahayag nga nagsinggitan ang lalaki sang tabang bangud napatay sini ang iya asawa, apang wala man nakahibalo ang iloy sang babayi kun may nagpalapit.
Problema man nila sa karun ang inugbayad sa punerarya.
