Nagpasalig ang punong barangay sang Barangay Tabugon, Kabankalan City nga magahatag sila sang bulig sa pamilya sang maglive-in nga napatay matapos nga magbun-anay sang Martes sang hapon.
Sa interview sang Bombo Radyo Bacolod kay Punong Barangay Ramil Sepida, naestoryahan na nila sa Barangay Council nga magahatag sang gamay nga bulig sa nalisdan nga pamilya.
Suno kay Sepida, sa purok hall naman ihaya ang duha bangud nag-ayo ang pamilya sa purok chairman nga hulamon ini anay bangud indi sila komportable kun sa balay.
Suno sa punong barangay nagalainay buot ang duha bangud nga gusto sang lalaki nga mangabuhi nalang sang malinong kag indi na magbalik sa Bacolod ang babayi agud magtrabaho.
Nabatian man sang ila kaingod nga nagsabtanay ang duha kag naghambal ang lalaki nga “PATYA NALANG KO” kag pagkatapos sini nagluntad na ang kinagamo.
Apang sa indi madugay, nabatian na ang singgitan sang lalaki nga nagapangayo sang tabang bangud napatay na sini ang babayi.
Ang babayi ang may mga pilas sa lawas kag ang lalaki ang may pilas naman sa liog.
Ang lalaki ang gindala pa sa ospital apang sang ginabiyahe na agud isaylo sa ciudad sang Bacolod ini ang ginbawian sang kabuhi.
