Ginpahayag sang Malacañang nga wala sang impormasyon natuhoy sa isa ka tiglikom nga ginaalegar ginatarget ni President Ferdinand Marcos Jr. sa pagpanawagan sini sa courtesy resignation sang mga miyembro sang iya Gabinete.
Suno kay Palace Press Officer Undersecretary Atty. Claire Castro, wala sila sang update kun may yara sang ginatarget nga tiglikom natuhoy sa request sini nga courtesy resignation.
Madumduman nga nagmando si Marcos sang courtesy resignations sang Cabinet secretaries nga may tinutuyo nga i-recalibrate ang iya administrasyon pagkatapos sang 2025 national and local elections.
Suno sa Presidential Communications Office (PCO), ang request para sa courtesy resignation ang magahatag sa Presidente sang elbow room agud i-evaluate ang performance sang kada ahensya.
