Ginpanginwala sang Deputy Majority Floor Leader sa House of Representative ang alegasyon nga ginbayaran kag ginpahog ang mga kongresista agud magpirma sang impeachment complaint batok kay Vice President Sara Duterte.
Sa interview sang Bombo Radyo Bacolod kay Iloilo 1st District Representative Dr. Janette Garin, nakibot ini sa ginpagwa nga alegasyon ni Navotas Congressman Tobias Tiangco, nga gingamit nga pamahog ang paghold sang budget sa mga programa.
Panindugan ni Garin nga magluwas sa mga kongresista, yara pa ang mga civil society groups, mga abogado, academe kag simbahan nga handa magpadayun sang impeachment complaint.
Nagapati ini nga dapat maglabay sa proseso kag pamatian ang complaints kag alegasyon, samtang pahanugutan man si VP Sara nga makasabat.
Panindugan ni Garin nga imposible ang pahayag ni Tiangco nga may natabo nga bayranay, assurance sang budget ukon paghold sang budget.
Suno diri, ang mga social services kaangay sang Ayuda para sa Kapos ang Kita Program (AKAP) ang may palarehas nga alokasyon.
Apang ang iban nga kongresista ang may dugang nga budget kun sila ang may adisyonal nga trabaho kaangay sang pagpamuno sa komitiba.
Indi man ini kumporme sa mga panawagan sa pagdula sang AKAP kag Assistance to Individuals in Crisis Situation (AICS) bangod madamo sang maapektuhan.
Indi man parehas ang purpose sang duha ka cash aid bangod ang AICS ang para sa mga wala sang trabaho samtang ang AKAP ang para naman sa mga may trabaho apang kulang ukon mga below minimum.
