Nangin maayo ang performance sang mga atleta sang Negros Occidental nga kabahin sang Western Visayas sa ginapatigayon nga Palarong Pambansa 2025 sa llocos Norte.
Sa interview sang Bombo Radyo Bacolod kay Romeo Sison, Provincial Sports Coordinator sang Negros Occidental, kahapon ang ikatatlo nga adlaw sang hinampang kag amo pa lang nag-umpisa ang malapuyot nga competition.
Suno diri, indi pa gid man madamo ang nakuha nga mga gold medal bangod may elimination rounds pa kag final games.
Sa bahin sang Negros Occidental, nakakuha sang gold medal si Mico Villaran sang Ramonito Maravilla National High School sa Bacolod City sa 110 meter hurdles kun sa diin ini na ang ikatatlo nga asod-asod nga nadaog sini ang gold medal sa amo nga competition.
Samtang, may yara man sang representante ang La Carlota City sa Arnis secondary girls nga nakakuha sang silver medal.
Nagdaog man ang secondary boys sa table tennis sang probinsya kag daog man ang futsal sang Western Visayas batok sa Zambaonga Peninsula sa score nga 11-1.
Samtang, daog man batok sa Region 1 ang Bacolod Tay Tung High School volleyball girls.
Pahayag ni Sison, nagalaum ini nga mangin kampyonato ang Western Visayas apang kun indi gid man nagapati ini nga may i-improve pa gid ang probinsya.
