Ginakumpirmar pa sang station commander sang Bacolod Police Station 3 kun may nagakaigo nga permit ang patigayunon nga transport strike kag rally protest sang mga unconsolidated traditonal jeepney drivers sa Bacolod City subong nga adlaw.
Madumduman nga mapatigayon sang rally protest kag transport strike ang kapin 800 ka units sang unconsolidated jeepneys sa probinsya sang Negros Occidental subong nga adlaw.
Una na nga ginpahayag ni Rudy Catedral, presidente sang Bacolod Alliance of Commuters, Operators and Drivers (BACOD), maga-upod sa transport strike kag rally ang miyembro sang Kabakod Negros Transport Coalition Incorporated (KNETCO) kag United Negros Drivers and Operators Center (UNDOC).
Sa interview sang Bombo Radyo Bacolod kay Police Major Rondyl Tapang, nakabaton na ini sang impormasyon nagikan sa iya mga intel angot sa patigayunon nga aktibidad sang mga jeepney drivers.
Suno kay Tapang, tsekyaron nila kun may yara sang permit ang magpatigayon sang transport strike kag rally protest.
Ini bangud consistent nila nga ipatuman ang direktiba ni Bacolod City Police Office Director Police Col. Joeresty Coronica.
Nahibaluan nga isa ang Bata flyover sa Barangay Mandalagan, Bacolod City ang venue sang nasambit nga aktibidad.
Suno kay Tapang, lantawon man sini kun ano ang nakasaad sa permit sang mga drivers kag operators sang unconsolidated traditonal jeepneys.
Mensahe sini nga may kinamatarong ang tagsa-tagsa sa freedom of expression kag derecho sang mga ini ang magrally apang dapat may permit.
Dugang pa sini nga indi dapat sang mga ini pagbalabagan ang mga drivers nga luyag nga magbiyahe kag wala nag-upod sa ila agud ipabutyag ang ila nga mga kawsa.
