Madamo sang maapektuhan inkaso bawion ang implementasyon sang Senior High School.
Sa interview sang Bombo Radyo Bacolod kay RJ Paglumotan, deputy spokesperson sang Department of Education division of Bacolod City, indi basta-basta nga mapauntat ang Senior High School sa idalom sang K to 12 program bangod ini ang isa na ka layi.
Ini kasunod sang panawagan ni Senator Jinggoy Estrada nga untaton na lamang ang implementasyon sang Senior High School program.
Pahanumdom sini nga ang layi, ang sarang ma-amyendahan apang ini ang malawig pa nga proseso.
Kabahin sa konsiderasyon amo ang tuman ka damo nga Senior High School teachers nga madulaan sang trabaho, mental stress sa kabataan kag ang mga establishimento nga gintukod para sa Senior High School.
Dugang pa ni Paglumotan nga ang Pilipinas ang ikaduha sa pinakauli nga pungsod sa Southeast Asia nga nakapatuman sang K to 12 Program.
Panindugan sini nga ang ginatudlo sa karun sa mga kabataan, ang husto kag nagakaigo na, sa baylo ang dapat nga bag-uhon amo ang qualifications sang mga kompanya ukon negosyo sa pagbatun sang empleyado.
Suno diri, madamo naman sang naggradwar sa Senior High School nga nakasulod sa trabaho, kag iban sa mga ini ang may mataas na nga posisyon partikular na sa Business Process Outsourcing (BPO) industry.
Ginakasubo ni Paglumotan, nga may mga mamalidha nga basta na lamang nagahatag sang komento nga wala nahibaluan ang nagakatabo sa idalom.
